УЛУУСПУТ ОСКУОЛАЛАРЫГАР ТИҺЭХ ЧУОРААН ЧУГДААРДА
Бүгүн, ыам ыйын 26 күнүгэр, улууспут оскуолаларыгар тиһэх чуораан чугдааран, оҕолорбутун олох киэҥ аартыгар атаарар долгутуулаах күн буолла.
Быйылгы үөрэх дьылыгар улууспутугар 5689 оҕо үөрэннэ. 9 кылааһы 575 оҕо, 11 кылааһы 394 үөрэнээччи түмүктээтэ.
Бу күн улуус баһылыга Дмитрий Тихонов, Ил Түмэн дьокутаата Андрей Находкин, улуус дьокутааттарын Сэбиэтин бэрэссэдээтэлэ Иннокентий Андросов, баһылыгы бастакы солбуйааччы Гаврил Толстяков, улуус баһылыгын нэһилиэнньэ олоҕун-дьаһаҕын хааччыйыыга солбуйааччы Николай Никифоров, салалталар, тэрилтэлэр салайааччылара, дьаһалта эппиэттээх үлэһиттэрэ үөрэх кыһаларыгар учууталлары, оскуола бары үлэһиттэрин, төрөппүттэри, үөрэнээччилэри долгутуулаах, бэлиэ күнүнэн эҕэрдэлээтилэр, үлэҕэ-үөрэххэ үрдүк ситиһиилэри, бары үтүөнү баҕардылар.
Быйылгы үөрэх дьылыгар оҕолорбут араас таһымнаах култуурунай бэстибээллэргэ, спортивнай күрэхтэргэ, кэмпириэнсийэлэргэ, олимпиадаларга үрдүк ситиһиилээхтэр. Учууталларбыт, оскуола бары үлэһиттэрэ, күннэтэ кэнчээри ыччаппыт үөрэхтээх, киэҥ билиилээх үтүө дьон буолан үүнэн тахсалларыгар айаллар-туталлар, таһаарыылаахтык үлэлииллэр.
Оҕолорбутугар эксээмэннэргитигэр ситиһиини баҕарабыт. Сөбүлүүр идэҕин талан, бу курдук дьаныардаахтык, үрдүк көрдөрүүлээхтик үөрэнэн тахсан улууспут, өрөспүүбүлүкэбит сайдыытын туһугар туруулаһан туран үлэлиир үтүө үлэһит дьон буолуоххут диэн бигэ эрэнэбит.
Билиини биэрбит күндү учууталларбыт, эһиги күннэтэ оҕолор өйдөрүгэр-санааларыгар үтүө сыһыаны, киһи буолар үрдүк суолу иҥэрэҕит, кэрэҕэ-сырдыкка уһуйаҕыт. Эһиги сыралаах үлэҕит, үрдүк дьоһуннаах буолуугут биһиги улууспут, өрөспүүбүлүкэбит сайдыытыгар саамай сүрүн олук буолар.
Хаартыскалары бу сигэҕэ көрүҥ: https://drive.google.com/drive/folders/1OBxlYrnghx-L6U4UlH6nU5p87qhy_Hrh?usp=sharing
Мэҥэ Хаҥалас улууһун дьаһалтатын пресс-сулууспата
УЛУУСПУТ ОСКУОЛАЛАРЫГАР ТИҺЭХ ЧУОРААН ЧУГДААРДА Бүгүн, ыам ыйын 26 күнүгэр, улууспут оскуолаларыгар тиһэх чуораан чугдааран, оҕолорбутун олох киэҥ а…
