Æрхæццæ кæронмæ Ирон æвзаг æмæ литературæйы къуыри. Ирон адæм мысыдысты сæ рухстауджыты нæмттæ, Хетæгкаты Къостайы " Ирон фæндыр" - ы æнæмæлгæ истори.
15 - æм майы нæ АЦ " Диалог " æцæгæйдæр уыди бæрæгбонхуыз. Æнæхъæн бон скъолайы ахуыргæнджытæ æмæ скъоладзаутæ уыдысты хъæлдзæгдзинады уацары. Сæумæрайсом , урокты райдайæны агъоммæ, айхъуысти ирон фæндыры цагъд. Фæндыры зæлтимæ æмбæлыдыстæм алы ахуыргæнæг æмæ скъоладзауыл дæр. Æрбахизæн срæсугъд кодтам цæстуынгæ æрмæгæй, алчидæр фæхайджын ирон зæрдиаг арфæтæй.
Ирон æвзаджы ахуыргæнæг Гасситы Фатимæ бацæттæ кодта тынг цымыдисаг презентаци нæ фыдæлты цардыуаджы тыххæй.
11 къласы ис диссаджы курдиатджын фæсивæд. Уыдон сарæзтой сæхи мидæг ансамбль. Цæгъдын куы райдыдтой , уæд сæ уадынгæрзты зæлтæ бæрæгбоны архайджытыл цыма базыртæ ныссагътой, уыйау кафынæй нал æфсæстысты.
Сывæллæттæ та кастысты æмдзæвгæтæ.
Бедойты Терезæ æмæ Кадиты Людмилæ радтой тынг зæрдæмæдзæугæ æмæ цымыдисаг гом уроктæ. Иу ныхасæй "Диалог" - ы ирон æвзаг æмæ литературæйы ахуыргæнджытæн сæ фыдæбон дзæгъæлы нæ уыди. Бæрæгбон ацыди тынг бæрзонд æмвæзадыл.
Цæрæд æмæ зæлæд æнустæм нæ ирон мадæлон æвзаг!
Æрхæццæ кæронмæ Ирон æвзаг æмæ литературæйы къуыри.
