Уран-шевер уруглар хөй Кызыл хоорайның 9 дугаар гимназиязынга 2002 чылда ажылдап эгелээн мен.

Уран-шевер уруглар хөй

Кызыл хоорайның 9 дугаар гимназиязынга 2002 чылда ажылдап эгелээн мен. Баштай тыва хеп: тон, бөрттер даарап өөредип эгеледим. 2000 чылдарның эгезинде тыва хепти, ёзу-чаңчылдарны диргизип турган үе болгаш, өөреникчилер дыка сонуургаар турган. Тыва херээжен улустуң эдилелдери, каасталгалары дээш, өгнүң иштики дерилгезин даарап өөредип турган мен. Оон чоорту школаның немелде өөредилге төвүнде бөлгүмнерде кээп турар уругларның хөй костюмнарын даарап, аңгы-аңгы мөөрейлерге, шиилерге кедер хептерин даарап эгеледим.

Оон хөй кескинди пөстер чыглы бээрге, «Кескиндиден дааранылга» деп адырны база киирип алган мен. Пөстер кескиндилеринден аңгы-аңгы чүүлдерни чогаадып, даарап, пөстен даараан ойнаар- кыстарны кылырынче эрткен чылын кирген бис.

Бөлгүмүвүстүң ажылын уруглар дыка сонуургаар, харын-даа оолдар безин кээп турар. Өөреникчилерим янзы-бүрү мөөрейлерге киржип, шаңналдыг черлерни ээлеп турар.

Бо чылдар дургузунда даараныр мергежил шилип алгаш, дээди эртемниг технолог специалистер болган өөреникчилерим база бар. Чойгана Кажыкай, Аяна Деге бо хүннерде даараныр цехтерлиг мастерлер болуп ажылдап чоруурлар. Амгы үеде эң-не идепкейлиг өөреникчилерим 7-ги классчылар Нараана Монгуш, Батыр Донгак, 10-гу классчылар Аина Ховалыг, Угулза Кужугет, 6-гы классчы Айхаан Шаалык, 4-кү классчы Алия Монгуш болгаш оон-даа өскелер бар.

«Чүрээм уругларга берип тур мен» мөөрейге киржип тургаш, «Дошка» деп легенданы таныштырган мен, 2016 чылда Улан-Удэ хоорайга Бүгү-делегей чергелиг эртем-шинчилел конференциязынга киришкеш, «Тергиин масстер-класс» номинацияга тиилээн мен.

Мая ДЕЛГЕР.
Авторнуң чуруктары.

#допобразование_юбилей