НИКОЛАЙ ЦЫПАНДИН 60 СААҺА Бүгүн Мэҥэ Хаҥалас улууһун ытык киһитэ - самбоҕа аан дойду үс төгүллээх чөмпүйүөнэ, успуорт үтүөлээх маастара, «Гражданскай …
Бүгүн Мэҥэ Хаҥалас улууһун ытык киһитэ - самбоҕа аан дойду үс төгүллээх чөмпүйүөнэ, успуорт үтүөлээх маастара, «Гражданскай килбиэн» уонна «Бочуоттаах динамовец» бэлиэлэр хаһаайыннара, улууспут Бочуоттаах олохтооҕо Николай Иванович Цыпандин 60 саастаах үбүлүөйдээх төрөөбүт күнүн бэлиэтиир.
Ытыктабыллаах Николай Иванович!
Мэҥэ Хаҥалас улууһун дьаһалтатын уонна дьокутааттарын Сэбиэтин аатыттан 60 сааскын туолбуккунан итиитик-истиҥник эҕэрдэлиибит!
Эн успуорт эйгэтигэр аан дойду таһымыгар Саха сирин аатын ааттатан, кыайыы үрдүк чыпчаалыгар тахсан бар дьоҥҥун үөрдүбүтүн. Үүнэр көлүөнэни иитэр-үөрэтэр сүдү үлэҕин үрдүктүк сыаналыыбыт. Ииппит ыччаттарыҥ Сахабыт сирин ааттата сылдьаллара - эн өр сыллаах үлэҥ түмүгэ уонна биһиги киэн туттуубут буолар.
Эйиэхэ чэгиэн туругу, дьиэ кэргэҥҥэр этэҥҥэ буолууну, эйэлээх халлааны уонна уһун дьоллоох олоҕу баҕарабыт! Инникитин даҕаны үөрэнээччилэргин саҥа кыайыыларга сирдии, бар дьоҥҥор үтүө сүбэ-ама буола тураргар баҕарабыт!
Мэҥэ Хаҥалас улууһун дьаһалтатын пресс-сулууспата