🌺Конкурс иртәгә.

🌺Конкурс иртәгә. Мин внеконкурса, шуна бүген язып куям😉
🌸Безнең гаилә тарихы күпләрнең күз алдында, танышу кыйссабызны да күпләр белә, әлеге язмам белән Америка ачмасам да, язам, дип вәгъдә иткәч, язарга кирәк😉
🌸1990нчы елда мәктәп тәмамлап, директор Рузил абыйның чакыруы буенча үзем укыган мәктәптә эшли башладым. Активистка, комсомолка, түлке спортсменка түгел, үзем колхоз радиоузелында диктор да, редактор да, колхоз спектаклендә артист та, Кар кызы да, кыскасы, первый парень в деревне апагыз😉
🌸 Такталачык авылының кичә генә армиядән кайткан егете, күрше тавыгы күркә булып күренә, диптер инде, 1991нең 21нче маенда безнең авылга кызлар күзләргә төшә. Нечкә билле, озын толымлы мин фәкыйрегезне күреп биһуш була😉
🌸Клубта бездән арткы рәттәге урындыкка килеп утырып, сөйләндерергә тырышып та барвп чыкмагач, әлеге егетебез кино беткәч, безнең колак ишетеп өйрәнмәгән искитмәле сүз белән мине биһуш итә. Нинди сүз дисезме. " Сезне озатырга мөмкинме", - дигән сүз. То- то шул. Минем дә андый сверхкультурный сүз ишеткәнем, кинодагыча рөхсәтләр сорап торганны күргәнем юк иде🤷‍♀️
🌸Алай егылып төшеп, рөхсәт, димәдем. Чәче кырып алынган такыр башына зәңгәр речфлот кепкасы кигән ул егетне күрү белән тюремщик, дип уйладым🙈
🌸Ни а, ни б дими генә, башны югары чөеп өстән аска карагандай күзне әйләндердем дә, фырт кына борылып, тиз- тиз генә атлап кайта башладым. Мин почти йөгерәм, ә теге егет ачуымны китереп ашыкмый гына ышанычлы адымнар белән арттан кайта.
🌸Шулвакыт, Ходайның хикмәте , урам буйлап каршыма 2-3 эт килә🤦. Ә мин этнең хәтта бет кебегеннән дә куркам. Адымнарның акрынайганын сизми дә калды түтәгез🙈...
🌸Шул көннән бер көн калмый ике авыл арасын таптап, 1996ның 18енче июле көнне кыз алырга килде егетебез.
🌸 Төс- кыяфәтемне генә ошатып калмагандыр, характерым усал тоелса да, күнелем нечкәлеген алдан күргән, тойгандыр. Юкса, 27 ел буена төп өйдә бианай әни белән яши алмаган булыр, үзебезгә бала сөю бәхете тоткарланганда, апа- абыйсының 2шәр малаен җәй көне 3әр ай буена үзебезнекедәй күреп үстерешмәс идем. Туй акчасына бианай әнигә алтын алка алып бирик, дип, сайлап алучы да әле мин. Мәрхүмәкәем, ул алканы бик яратып гомер буе киде.
🌸Кайчакларда, гел мин дигәнчә булмаганда, үз әниемә зарланып берәр сүз әйткәндә, ул һәрчак, кияү үзе юньле булгач, түзәсең инде, балакаем, ди иде. Менә шул нәкъ менә юньле буласын мин дә белгәнмендер, юкса 5 ел буена йөрмәс, кияүгә чыкмас идем. Менә шушы җөмләгә бөтенесе дә сыеп беткән.
🌸Күршебез Әнисә апа һәрчак, кыз баланың теләге кабул була, теләк теләгез, ди иде. Теләдем мин 3 теләк, 3се дә кабул булды. Бакчасы кеше күзеннән читтә булсын иде, дидем. Бакчасы йомшак булсын иде, дидем. Суы якын булса иде, дидем. Нәрсә үзәккә үткән, шуны теләгәнмен инде.
🌸Тормышыбыз, әйткәнемчә, күпләрнең күз алдында булды.
Гаиләбез- башка гаиләләрдән берни белән дә аерылмый. Ут чәчеп талашкан чаклар да, 15 минут сөйләшми йөргән чаклар да була. Мәҗлесләрдә һәрвакыт күземә тутырып карап, мәхәббәт, мәхәббәт инде, дип җырлап йөргән егетем хәзер җырламый инде. Ә минем исем китми. 18әр битле 2 шакмаклы дәфтәрне тутырып мина багышлап язып биргән шигырьләрен укыйм😉
🌸Бик озак көттереп, 7 елдан соң туган улыбыз, кызыбызның кадер- хөрмәтендә, тигезлек белән рәхәт, кадерле, сәламәт картлык кичерергә язсын, дигән теләгем фәрештәләрнең амин, дигән чакларына туры килсә иде🙏
Алда ята яңа юллар,
Без үтәсе юл булсын.
Гомер бергә тибәр йөрәк,
Тотынышкан кул булсын!

Гомер буе хәтерләрлек
Чаклары да күп аның,
Яхшы чагы — гөлләр аның,
Начар чагы — чүп аның.