«ААҔЫҤ» СОНУН БЫРАЙЫАК ДЬОН СЭҤЭЭРИИТИН ЫЛЛА 2026 сыл - Култуура сыла Мэҥэ Хаҥалас улууһугар сонун бырайыактарынан, айар үлэлэринэн салҕанар.

«ААҔЫҤ» СОНУН БЫРАЙЫАК ДЬОН СЭҤЭЭРИИТИН ЫЛЛА

2026 сыл - Култуура сыла Мэҥэ Хаҥалас улууһугар сонун бырайыактарынан, айар үлэлэринэн салҕанар. Муус устар 7 күнүттэн 16 күнүгэр диэри улуус нэһилиэктэринэн «ААҔЫҤ» диэн ааҕыыны көҕүлүүр ураты бырайыак түөрт түөлбэ холбоһугунан ситиһиилээхтик ыытылынна.

Бу сонун бырайыак ааптарынан Мэҥэ Хаҥаластааҕы кииннэммит бибилэтиэкэ ситимин дириэктэрэ Марианна Никанорова буолар. Бырайыак икки сүрүн чаастан турар: нэһилиэктэр икки ардыларынааҕы «ААХ.БИЛ.КЫАЙ» өй-санаа оонньуута уонна «Книга на сцене» чэрчитинэн Артур Томас Уоткин «Ллойд Роуд стрит кистэлэҥэ» испэктээги көрдөрүү.

Билиини тургутар «ААХ.БИЛ.КЫАЙ» оонньуу сүрүн сыалынан - ааҕыыны көҕүлээһин, билиини тургутуу уонна бөлөҕүнэн үлэлиир кэмҥэ санаа атастаһыытын тэрийии буолла. Күрэх биэс интэриэһинэй түһүмэҕинэн ааста: тургутук боппуруостар, айымньы аатын тиэкистэн булуу, ырыа ааптарын таайыы, дьоруойу билинии уонна «Тобул» диэн суругунан эппиэттээһин.

Оонньууну Майатааҕы оҕо бибилэтиэкэтин сүрүннүүр бибилэтиэкэрэ Лилия Федорова сэргэхтик иилээн-саҕалаан ыытта, оттон техническай өттүн дириэктэр солбуйааччыта Анна Петрова үрдүк таһымнаахтык хааччыйда. Дьүүллүүр сүбэҕэ бибилэтиэкэ эйгэтин идэлээхтэрэ Марианна Никанорова, Надежда Сидорова уонна Марина Трифонова үлэлээтилэр.

Бырайыак улуус үрдүнэн 27 хамаанданы хапта:
Муус устар 7 күнүгэр Алтан нэһилиэгэр 8 хамаанда кытынна. Кыайыылааҕынан Бүтэйдээх нэһилиэгин «Толоон» хамаандата буолла.
Муус устар 10 күнүгэр Ходоро нэһилиэгэр 6 хамаанда икки ардыгар Догдоҥо нэһилиэгин «Күн» хамаандата бастаата.
Муус устар 14 күнүгэр Төҥүлү нэһилиэгэр 6 хамаандаттан Мэҥэ нэһилиэгин «Ситим» хамаандата инники күөҥҥэ таҕыста.
Муус устар 16 күнүгэр Аллараа Бэстээх бөһүөлэгэр 7 хамаанда киирсибититтэн Хаптаҕай нэһилиэгин «Сайдам» хамаандата кыайыылаах аатын ылла.

Түөрт оонньуу олус көхтөөхтүк аастылар. Оонньууларга кыайбыт хамаандалар - «Толоон» Бүтэйдээх, «Күн» Догдоҥо, «Ситим» Мэҥэ уонна «Сайдам» Хаптаҕай - ыам ыйын 27 күнүгэр, Бүтүн Арассыыйатааҕы бибилэтиэкэ күнүгэр, И.М. Сосин аатынан улуустааҕы киин бибилэтиэкэҕэ муҥутуур кыайыылааҕы быһаарыахтара.

Кыттыылаахтар бырайыак ис хоһооно олус дириҥин бэлиэтээтилэр уонна маннык өйү байытар оонньуулар салгыы ыытылла туралларыгар баҕа санааларын эттилэр.

Маны таһынан улуустааҕы киин бибилэтиэкэ кэлэктиибэ ааҕыыны киэҥ араҥаҕа тарҕатар уонна кинигэ абылаҥын атын хайысханан арыйар сыаллаах «ААҔЫҤ» бырайыагы ситиһиилээхтик ыытар. Бу сырыыга бибилэтиэкэ үлэһиттэрэ бэйэлэрин артыыс быһыытынан холонон көрөн, Артур Томас Уоткин «Ллойд Роуд стрит кистэлэҥэ» диэн детектив жанрдаах испэктээгин оонньуулар ыытыллыбыт түөлбэлэригэр көрдөрдүлэр. Көрөөччүлэр артыыстары кытта тэҥҥэ испэктээк тыҥааһыннаах туругар киирэн, олус астынан, сэргээн көрдүлэр. Дьон-сэргэ бибилэтиэкэ үлэһиттэрин айар дьоҕурун үрдүктүк сыаналаата уонна инникитин да сонун бырайыактары күүтэллэрин биллэрдилэр.

Мэҥэ Хаҥалас улууһун дьаһалтатын пресс - сулууспата