Пәйгамбәребезﷺ әйтте: “Коръәнне укыгыз.

Пәйгамбәребезﷺ әйтте: “Коръәнне укыгыз. Дөреслектә, кем Коръән укыды, ул кешегә Кыямәт көнендә Коръән шәфәгать кылачак”.
📌 (Мөслим риваяте)

Бу Коръән укуның фазыйләтле булуына дәлил булып тора. Кыямәт көнендә Коръән яклаучы, шәфәгәть кылучы булачак. 

Пәйгамбәребезﷺ әйтте: “Кем дә кем Коръән укый, аның бер хәрефенә 10 әҗер-савап. Мин әйтмим Әлиф, Ләм, Мим 1 хәреф дип. Әлиф - 1 хәреф, Ләм -1 хәреф, Мим - 1 хәреф”.
Шушы 3 хәрефкә генә дә 30 әҗер-савап языла. Рамазан аенда Коръәнне тулысынча укып чыгу күпме әҗер-савап бирәчәк!

Коръән укуның да әдәпләре бар:
1️⃣. Ихлас булу, Аллаһ ризалыгы өчен уку. “Сезгә ихластан Аллаһ динен тотаргаәмер ителде”. (“әл-Бәийнә” сүрәсе, 5нче аять) Пәйгамбәребез ﷺ әйтте: “Һәрбер эш нияткә карап бәяләнә”.
📌 (Бохари риваяте)

2️⃣Коръән укыганда чиста-пакъ, тәһарәтле булу. Чөнки КоръәнАллаһ Тәгалә сүзләре.

3️⃣ Коръән укыр алдыннан мисвак куллану, ягъни тешләрне чистарту. Авыздагы тәмсез исләрне бетерү – мөстәхәб. Чөнки Аллаһ сүзләрен укыйбыз.

4️⃣ Әгәр сәҗдә аятьләре очраса, сәҗдә кылу.

5️⃣ Әгәр мәчеттә кардәшләребез янында укысак, бер-беребезгә комачауламау. Пәйгамбәребез ﷺ әйтте: “Коръәнне укыганда бер-берегезгә комачауламагыз, бер-берегездән арттырам дип, тавышларыгызны күтәрмәгез”
📌(Әбу Давыт).

6️⃣“Коръән ул сине яклаучы яки сиңа каршы булачак”.
📌(Мөслим җыентыгыннан)

Бу хәдиснең мәгънәсе: Коръәнне укып, бер савап алсак, өстебездәге төп бурыч –  Коръән белән гамәл кылу: Аллаһ Тәгалә кушкан әмерләрне үтәү, тыйганнарыннан тыелу. Әгәр шулай гамәл кылсак, Коръән безгә шәфәгать кылачак.

Кайбер элеккеге галимнәр әйткән: “Коръән мәҗлесеннән кеше я сәламәт булып чыга, я үзенә хәсрәт ала, ягъни югалтуга юлыга”.

Коръәнне кеше укый, фикерли, мәгънәсенә төшенә, ләкин шуның буенча гамәл кылмый икән, аңа Кыямәт көнендә яклаучы булмый, киресенчә, “Син мине укыдың, Аллаһ Тәгаләнең әмерләренә буйсынмадың, хәсрәттә бул!” дип, сиңа каршы чыгачак.

Коръән иңүнең иң зур хикмәте нидә?
1️⃣Шушы килгән әмерләргә тәсдыйкъ кылу – ышану.
2️⃣ Аның белән гамәл кылу.
3️⃣Әмерләренә буйсыну.
4️⃣Аллаһ Тәгалә тыйганнардан, харамнан тыелу.

Безнең максат чиста уку гына түгел. Әйе, дөрес итеп, тиешле җирдән авазларны чыгарып, тиешенчә сузып укырга тырышырга кирәк.

Ләкин безнең төп максат Коръән белән яшәү. Гарәпчә аңламасак, рус һәм татарча тәрҗемә тәфсирләргә таянып эш итәргә тырышыйк.

Ибнү Мәсгүд радыйаллаһу әйтә: “Без пәйгамбәребез вакытында 10 аятьне өйрәнә идек һәм шул 10 аятьне фикерләп, ятлап гамәл кылмыйча, икенчеләргә күчми идек”. Кайбер сәхәбәләр“Бәкара” сүрәсен 8 ел ятлаган.

Чөнки максатлары уку гына түгел, гамәл кылу иде. Шуңа күрә безгә үзебезне тәрбияләргә кирәк.

Беренчедән, гарәп хәрефләрен, аннан соң тәҗвид кагыйдәләрен, хәрефне дөрес чыгарып укырга өйрәнү зарур.

Аннан соң, көчебездән килсә, гарәпчә өйрәнергә, мәгънәсенә төшенергә кирәк. Гарәпчәне өйрәнә алмасак, тәрҗемәләргә кайтып, тәфсирләрен укып, шуның белән гамәл кылырга тырышырга кирәк.

Кабатлап әйтәм: Коръән белән яшәмәсәк, Кыямәт көнендә ул безгә шәфәгать кылмаячак.

🤲 Аллаһ Сөбхәнә Тәгалә барыбызга да тәүфикь-һидәят, Коръән Кәримне укуда, аның белән гамәл кылганда сабырлык, үҗәтлек, тырышлык бирсә иде, хаклыкта ныгытса иде.

Раил Фәйзрахманов