Мөхәммәд пәйгамбәр үзенә иярмәгән, аны пәйгамбәр дип танымаган кешеләргә ләгънәт укыганмы?
Пәйгамбәребезнең Таифка бару тарихын укысак үзебез өчен бик зур сабак алып була. Ул анда халыкны иманга, яхшылыкка өндәргә дип бара. Ә җавап итеп кешеләрдән мыскыл итү, түбәнсетү сүзләре ишетә, аны Таифтан ташлар атып куып чыгаралар. Аягы яраланып, башмагы кан белән тула хәтта😢
Талчыгып, хәле бетеп утырганда аның янына Җәбраил фәрештә килеп: син риза булсаң мин бу халыкны җир белән тигезлим,- ди. Пәйгамбәребезнең җавабы мондый була: мин дөньяга рәхимлелек өчен җибәрелдем. Бәлки киләчәктә бу җирлектән Аллаһны танучы халык чыгар, дигән ул🥹 Әле бу кешеләр тумаган, әле алар Аллаһка буйсынырмы, юкмы билгесез, ә Пәйгамбәребез инде аларны кайгырта, алар турында уйлый☝️ Шушы урында аның хисләре, холкы турында уйлап карыйк әле. Бу вакытта аның белән нинди хисләр идарә итте икән? Ә бездә, аның үрнәгендә холкыбызны тәрбияләргә тырышучы мөселманнарда, мондый вакытларда нәрсә өстенлек итә? Һәрберебезнең җавабы үзе өчен уйланырлык сәбәп булсын иде.
Пәйгамбәребез җәберләнгән вакытта да әле дөньяга килмәгән кешеләр турында кайгырган. Аның шушы рәхимлеге, сабырлыгы, зирәклеге сәбәпле, Таиф бүген дин ягыннан иң алга киткән шәһәрләрнең берсе🥰
Альбина Фазлыева блогыннан